ҚР Премьер-Министрі Олжас Бектенов Үкімет отырысында Қазақстанда роботтандыруды енгізу жұмыстарын жеделдетуді тапсырды, — деп хабарлайды Tengrinews.kz тілшісі.
«Роботтандыру бойынша мен толық қолдаймын, бұған дейін де тапсырмалар бергенмін. Бағдарлама мүмкіндігінше қарапайым, түсінікті, теориясыз, қолданбалы болуы керек, біз роботтандыруды енгізу бойынша нақты жұмыс істеуіміз керек», — деді Бектенов Үкімет отырысында.
Сонымен қатар, Премьер-Министр робот өндірумен айналысатын компания басшыларымен ықтимал ынтымақтастықты талқылау үшін кездесуге дайын екенін білдірді.
«Қазақстан машина жасаушылар одағы» заңды тұлғалар бірлестігі басқарма төрағасы Мейрам Пшембаевтың мәліметі бойынша, Сингапурда 10 мың жұмысшыға 1 мыңнан астам робот келеді, Оңтүстік Кореяда — 800-ден астам, Германия мен Жапонияда 400-ден астам. Қазақстанда бұл көрсеткіш небәрі 7 роботты құрайды.
