Astana Hub – Орталық Азиядағы ең ірі халықаралық технопарк, алты жыл бойы аймақтағы IT-индустрия мен инновациялардың дамуына катализатор болып келеді. 2018 жылдың 6 қарашасында ресми түрде іске қосылғаннан бері технопарк экожүйені белсенді дамытып, стартаптарды қолдап, елдің экономикалық өсуі мен технологиялық прогресіне жағдай жасауға ұмтылады. Мемлекет басшысы мен Қазақстан Үкіметінің, атап айтқанда, ҚР Цифрлық даму, инновациялар және аэроғарыш өнеркәсібі министрлігінің, сондай-ақ стратегиялық серіктестердің қолдауының арқасында Astana Hub технологиялық бизнес үшін экожүйені дамытуда айтарлықтай нәтижелерге қол жеткізді.
Экожүйе және инфрақұрылым: 2018 жылдан бастап технопарк қатысушыларының саны 185-тен 1571 компанияға дейін өсті, оның ішінде шетелдік қатысуы бар 430-дан астам қатысушы бар. Технопарк қатысушылары құрған жұмыс орындарының саны 28 мыңнан асты. Astana Hub стартаптарға салық жеңілдіктеріне, жеңілдетілген еңбек және визалық режимдерге, кеңсе және тұрғын үй-жайларға қол жеткізуді қамтамасыз етеді, бұл Қазақстанның IT-қауымдастығының белсенді дамуына ықпал етеді. Технопарк инфрақұрылымында Playrix, TikTok, inDrive, EPAM, Glovo, DAMUMED, Presight.ai және басқа да ірі халықаралық компаниялардың кеңселері орналасқан.
Түсімнің және экспорттың өсуі: Технопарк резиденттерінің жалпы табысы іске қосылғаннан бері 1,9 млрд долларды құрады, 2019 жылы 35 млн доллардан бастап, 2023 жылға қарай 875 млн долларға жетті, ал 2024 жылға болжам 1 147 млн долларды құрайды. Astana Hub қатысушыларының қызмет экспорты да қарқынды өсуде: соңғы төрт жылдағы табыс 630 млн долларды құрады, ал 2024 жылдың қорытындысын ескере отырып, бес жыл ішінде қатысушылардың жиынтық IT-экспорты 1 млрд доллардан асады деп күтілуде.
Инвестиция тарту: Алты жыл ішінде Astana Hub стартаптары 665,5 млн доллар инвестиция тартты, бұл Қазақстанның IT-экожүйесін айтарлықтай нығайтуға және жобаларды халықаралық деңгейге шығаруға мүмкіндік берді. Халықаралық нарықтарда сәтті масштабталатын перспективалы стартаптардың қатарында CerebraAI, CodiPlay, Parqour, ApartX, Kwaka, Biometric, Beksar, Alaqan, Zypl.ai, ZebraEye, Arlan Biotech және басқалары бар.
Стартаптарды қолдаудың негізгі бағдарламалары: Astana Hub стартаптарға Scalerator, Techpreneurs, Startup Garage және Global Outsourcer бағдарламалары арқылы дамудың барлық кезеңдерінде қолдау көрсетеді. Флагмандық акселераторлардың қатарында Google for Startups компаниясымен бірлесіп әзірленген Silkway Accelerator бар, ол стартаптарға халықаралық нарықтарға шығуға көмектеседі. 1300-ден астам өтінімнің ішінен Орталық Евразияның 62 стартапы оны сәтті аяқтап, жалпы капитализациясы 430 млн долларға жетіп, БАӘ, Түркия және АҚШ нарықтарында 27 млн доллар инвестиция тартты. Дүниежүзілік банктің қолдауымен Draper University бірлесіп жүзеге асыратын Hero Training бағдарламасы Кремний алқабында масштабтау мүмкіндіктерін ашады. Оған 37 стартап қатысты, оның ішінде әлемге әйгілі венчурлық инвестор Тим Дрейперден 1 млн доллар инвестиция тартқан CITIX бар.
Кадрлық әлеуетті қалыптастыру: Tech Orda бағдарламасы IT-білім берудегі жетекші бастама болып табылады: іске қосылғаннан бері 9 мыңнан астам қазақстандық IT мамандықтары бойынша тегін білім алу мүмкіндігіне ие болды, ал жоспарларда – 2025 жылға қарай 20 мың адамды оқыту, мемлекеттік қолдаумен әрбір студентке 600 000 теңгеге дейін қаражат бөлінеді. Сондай-ақ, Astana Hub Alem School, No Code/Low Code School, Startup School, Beta Career, Freelance School, IT-Aiel және басқа да білім беру бағдарламаларын ұсынады. 2024 жылдың шілдесінде пилоттық режимде елдің 180 мектебі үшін бағдарламалау негіздері бойынша онлайн-платформа іске қосылды, онда 120 тренер 10-11 сыныптардың 19 мыңнан астам оқушысын No Code, Low Code және Startup Academy бағдарламалары бойынша оқытады.
Аймақтық даму: Astana Hub жергілікті IT-қауымдастықтарды және Қазақстандағы IT-таланттардың тұрақты ағынын қалыптастыруға ықпал ететін аймақтық IT-хабтарды белсенді дамытуда. Қазіргі уақытта елде 17 аймақта IT-хабтар жұмыс істейді, ал жыл соңына дейін он сегізіншісі ашылады. Бұл орталықтар цифрлық құзыреттер мен жергілікті қауымдастықтарды дамыта отырып, ұлттық технологиялық экожүйенің негізгі элементтері болып табылады. 2023 жылдан бастап аймақтық хабтарда 7 жаһандық форумды қоса алғанда, 1600-ден астам іс-шара өткізілді, олар 48 мыңнан астам қатысушыны жинап, 440 стартапты ұсынды, бұл IT-білім беруді дамытуға және жаңа жұмыс орындарын құруға ықпал етеді.
Жасанды интеллект бойынша бастамалар: Жасанды интеллект (ЖИ) саласын дамыту – Astana Hub-тың басым бағыттарының бірі, бұл Қазақстанда ЖИ-ді насихаттауға және дамытуға бағытталған ауқымды AI Movement бағдарламасын іске қосуда көрініс тапты. Бағдарлама аясында елдегі алғашқы жасанды интеллект мектебі – Tomorrow School ашу, ең ірі Decentrathon хакатоны, AI People Bootcamp, «ЖИ негіздері: ChatGPT» онлайн-курсы және аймақтар бойынша Roadshow сияқты бастамалар жүзеге асырылды. Бұл жобалар талантты мамандарды тартып, оларды ЖИ саласында оқыту үшін жағдай жасайды, 2025 жылы ашылуы жоспарланған Ұлттық жасанды интеллект орталығының негізін қалыптастырады.
Негізгі мақсаттар: Astana Hub стартаптарды қолдау және Қазақстан экономикасын цифрландыру үшін экожүйені белсенді дамытуды жалғастыруда, алдына ауқымды мақсаттар қойып отыр: 2026 жылға қарай IT-қызметтер экспортын 1 млрд долларға жеткізу және 2027 жылға қарай қазақстандық «жалғыз мүйізді» (unicorn) дайындау.
