Өтетін күні мен уақыты: 10 ақпан, сағ. 19:00
Өтетін жері: Роза Бағланова атындағы «Қазақконцерт» МАКҰ (Мәңгілік ел, 10/1)
Роза Бағланова атындағы «Қазақконцерт» мемлекеттік академиялық концерттік ұйымында танымал композитор, Қазақстанның еңбек сіңірген өнер қайраткері, «Парасат», «Құрмет» ордендерінің иегері Кеңес Дүйсекеевтің шығармашылығына арналған «Сәлем саған, туған ел» атты музыкалық кеш өтеді. Аталған іс-шара композитордың 80 жылдық мерейтойына орай ұйымдастырылып отыр және республикалық деңгейде өткізілетін алғашқы іс-шаралардың бірі болғалы тұр.
Концерттік бағдарламада композитордың ел жүрегінен орын алған таңдаулы шығармалары орындалып, оның ұлттық өнерге қосқан өлшеусіз үлесі мен тағылымды шығармашылық жолы кеңінен таныстырылады. Атап айтқанда, «Сәлем саған, туған ел», «Ойлайсың ба, жаным», «Домбыра туралы баллада», «Өкінбе сен», «Ғашықтар жыры», «Қарағым-ай, «Анаға хат» және т.б. туындылары көрермен назарына ұсынылады.
Іс-шараға Қазақконцерттің өнер жұлдыздары мен шығармашылық ұжымдары қатысады: Нұрлан Өнербаев, Құрмаш Махан, Бауыржан Исаев, Ербол Тәжібаев, Алтыншаш Мұқатаева, Әділжан Толықпаев, Анна Уварова, Асқар Мұқият, Әділхан Макин, Зарина Макина, Ерлан Рысқали, Перизат Тұрарова, Қуандық Шалқарұлы, Асылхан Шалқаров, Алибек Альмадиев, Нұрай Мықты, Ибрахим Амин, Сұлтан Ахмет, Айым Қоғам, Венера Табыс, «Saz&Soul» тобы, «Астана» эстрадалық симфониялық оркестрі, G-бэнд, «Gulder» ансамблі. Сондай-ақ, Қазақстанның еңбек сіңірген қайраткерлері Сембек Жұмағалиев, Алтынай Жорабаева, «Астана» эстрадалық-симфониялық оркестрінің көркемдік жетекшісі, «Құрмет» орденінің иегері Ержан Исин және Ресей халық әртісі, дирижер, джаз пианисі, «Фонограф-Симфо-Джаз» оркестрінің жетекшісі Сергей Жилин өнер көрсетеді.
Кеңес Дүйсекеев — қазақ музыка өнерінің алтын қорына енген бірегей туындылардың авторы, ұлттық рух пен заманауи әуенді шебер ұштастырған көрнекті композитор. Оның шығармашылық мұрасында «Толғау» симфониясы, «Жалаңтөс батыр» симфониялық поэма-картинасы, «О, дүние» кантатасы, «Жыл мезгілдері» романстар циклі, сондай-ақ «Жан әке», «Қарағым-ай», «Сәлем саған, туған ел», «Өкінбе сен», «Ғашықтар жыры» және т.б. кеңінен танымал музыкалық шығармалары бар. Сонымен қатар композитор «Мәди», «Аққу Жібек» мюзиклдерінің, «Алдар көсе» опереттасы, симфония-концерт пен түрлі аспаптарға арналған концерт, камералық оркестрге арналған шығармалар мен 200-ден астам әннің авторы.
